Helga Sigfríður Snorradóttir

Lokahnykkurinn

2003-11-30T23:38:00.000Z

Þá er ég loksins búin að skila öllum verkefnum þessa misseris. Ég var að ljúka við að lesa yfir heimasíðuna mína og athuga hvort allar krækjur væru ekki virkar o.þ.h. þannig að ég vona að allt sé í stakasta lagi þar.

Eftir svona námslotu er gott að fá útrás með hreingerningu og jólabakstri. Ég er einmitt búin að taka törn í dag, búin að þvo frá flestum gluggum og setja upp aðventuljós.
Ég held kannski áfram að blogga í desember - hver veit!!

Skilasíðan

2003-11-27T20:20:00.000Z

Loksins er ég búin með skilasíðuna mína - að ég held. Ég var að bæta inn tenglum fyrir persónulega vefinn og myndaalbúmið og gefa upp notandanafnið mitt á spjallinu. Vonandi hef ég náð að skilja öll verkefnin rétt. Mér hefur fundist mjög gaman á þessu námskeiði og er orðin mun frískari í heimasíðugerðinni heldur en ég var í haust!! Ég ætla að halda áfram að blogga fram að mánaðamótum :)

msn

2003-11-26T22:36:00.000Z

Nú fer aldeilis að síga á seinni hlutann í þessu námskeiði. Ég hef verið að reyna að skrá mig inn á msn en hef einhverra hluta vegna ekki komist í gegn. Ég er að kenna 7. bekk og var ég að biðja nemendur mína um leiðbeiningar og hver veit hvað kemur út úr því. Krakkarnir eru nú svolítið stolt af þeirri "gömlu" að vera svona nýjungavæn í tölvusamskiptunum :)

Glærukynningar með fyrirlesurum

2003-11-23T00:42:00.000Z

Ég komst því miður ekki inn á glærukynningarnar frá staðnemunum. Hins vegar hef ég séð þessa tækni hjá einhverjum kennaranum í KHÍ, mig minnir að það hafi verið Ingibjörg Frímanns. Hún tók upp fyrirlestra í staðnáminu og sendi þá út til okkar fjarnemanna. Það var reyndar galli að hún varð þá að standa kyrr á meðan á upptöku stóð. Mér finnst þetta alveg frábær möguleiki, en hins vegar finnst mér ekkert betra að taka við efninu þó að fyrirlesari "sé á staðnum." Það verður spennandi að sjá hvernig þessi tækni á eftir að þróast, hún fer varla að standa í stað héðan af!!

Photoshop

2003-11-17T18:21:00.000Z

Í skólanum hef ég mikið verið að taka myndir af bekknum mínum núna undanfarið. Ég hef lítið sem ekkert komið nálægt myndvinnslu hingað til, en ég hef notið góðs af kunnáttu sambýlismannsins míns í þessum efnum. Hann hefur hjálpað mér að sníða myndirnar til, lýsa þær og laga á allan hátt, þannig að ég er að komast upp á lagið með að bjarga mér í þessu. Þetta er virkilega skemmtileg vinna og gefur krökkunum mikið að fá myndir af sér á heimasíðu bekkjarins.

Enn ein námshelgin...

2003-11-16T00:14:00.000Z

Einhvern veginn hefur mér tekist að gleyma blogginu í miðri viku, enda mikið að gera. Haustannarpróf í grunnskólanum eru loksins búin og hef ég setið sveitt við að yfirfara próf, skrá inn einkunnir o.þ.h. Foreldrafundur verður svo fimmtudaginn 20. nóvember n.k. Ég hlakka alltaf svolítið til þess dags, þar sem mér finnst svo gaman að ræða við foreldra barnanna "minna".

Ég var að ljúka við mikla skýrslu í námskeiðinu Einelti hjá henni Vöndu Sigurgeirs. Það var mikil vinna en skemmtileg og altaf er gott þegar hvert verkefni klárast.

Námshelgi

2003-11-09T00:29:00.000Z

Þá er kominn laugardagur og ætla ég að nota alla helgina til náms, enda ótrúlega stuttur tími eftir af þessu misseri. Ég held að ég sé alveg á réttu róli í Upplýsingatækninni og reyndar öllu öðru, en maður má hafa sig allan við að halda öllu á floti. Ég tók mig til í dag og kláraði síðasta verkefnið í "Frá eddukvæðum til óðflugu" hjá honum Þórði Helga. Þannig að allt tekur enda um síðir, þolinmæði þrautir vinnur allar o.s.frv......

Fjórða lotan búin

2003-11-03T23:29:00.000Z

Þá er fjórða lotan búin í námskeiðinu Upplýsingatækni og skólastarf. Þar var gert powerpoint verkefni og skólaverkefni og var mjög gaman að vinna að þeim verkefnum báðum. Þau eru komin inn á heimasíðuna mína og gekk allt að óskum þar. Hins vegar sé ég að tengingin af heimasíðu námskeiðsins inn á skilasíðuna mína er ekki rétt, en ef ég þekki Salvöru rétt þá kippir hún því í liðinn við fyrsta tækifæri.

Veikindi

2003-11-02T22:18:00.000Z

Nú er ég búin að liggja veik í tvo daga og hef varla reist höfuð frá kodda. En nú er ég öll að koma til og fer galvösk í vinnu á morgun og tekst á við vinnuvikuna með brosi á vör.
Framundan eru annarpróf í grunnskólanum og er nóg að gera við að semja próf, leggja þau fyrir, yfirfara þau og ekki má gleyma sínum eigin börnum, það þarf víst líka að hjálpa þeim með heimalærdóminn.

Skólaverkefni

2003-10-26T21:25:00.000Z

Mikið var nú gaman að hlusta á hann Jóhann Inga á námskeiðinu s.l. mánudag. Við sátum frá kl. 10-16 í frekar lélegum stólum, en það tók enginn eftir því fyrr en eftir á. Jóhann Ingi fór á kostum eins og besti "uppistandari" og var engin hætta á að neinn myndi sofna, ekki einu sinni geispa!! Ég mæli með honum.

Helgin hjá mér hefur verið fremur róleg í lærdómnum. Börnin og fjölskyldan hafa átt allan minn tíma, en þó hef ég sest niður seint á kvöldin og kíkt aðeins í tölvuna. Ég náði t.d. að klára Skólaverkefnið í UTS, en ég var búin að fara í vettvangsferð í Grunnskólann á Ísafirði, punkta niður efni og taka myndir. Afraksturinn getið þið séð hér.

Lífið eftir samræmdu prófin...

2003-10-19T23:40:00.000Z

Jæja, þá eru samræmdu prófin búin og daglegt líf tekið við. Á morgun, mánudag er starfsdagur kennara við alla grunnskóla Ísafjarðarbæjar. Jóhann Ingi Gunnarsson sálfræðingur, ætlar að halda námskeið fyrir okkur og hlakka ég til að hlýða á hann. Meðal annars mun hann fjalla um liðsanda og liðsheild og býr hann örugglega vel eftir vinnu með íslenska landsliðið í handbolta á sínum tíma (er hann kannski ennþá að vinna með þeim?) o.fl. o.fl. sem hann hefur gert um dagana.

Samræmd könnunarpróf í stærðfræði og íslensku

2003-10-15T20:46:00.000Z

Það stendur mikið til hjá bekknum mínum næstu daga, þar sem samræmdu prófin standa þá yfir. Mér líður eins og ungamömmu að sleppa ungunum sínum á flug í fyrsta skipti, en samt sem áður hef ég ekki miklar áhyggjur af krökkunum, þau koma til með að standa sig með prýði. Mín skoðun er sú að allt of mikið sé gert úr þessum prófum. Ég hef heyrt dæmi þess að hauststarf sumra skóla sé undirlagt fyrir samræmdu prófin og lítið sem ekkert annað gert í 4. og 7. bekk fyrr en þeim sleppir. Það finnst mér alls ekki gefa rétta mynd af stöðu nemendanna, ef búið er að skrúfa upp íslensku og stærðfræði hjá sumum skólum, en öðrum ekki. Hins vegar finnst mér þessi próf gagnlegt mælitæki ef vel er að staðið.

Vefspjallið

2003-10-11T17:07:00.000Z

Ég má til með að hrósa henni Salvöru fyrir dugnaðinn og eftirfylgnina í þessu námskeiði. Okkur er val haldið við efnið og alltaf einhverjar spennandi nýjungar kynntar fyrir okkur. Nú er ég búin að stimpla mig inn í vefspjallið og finnst það alveg frábær vettvangur fyrir okkur til að koma skoðunum á framfæri. Vefspjallið opnar líka möguleika á nánari samskiptum okkar fjarnema.

Ný vinnuvika

2003-10-06T22:49:00.000Z

Þá er ný vinnuvika hafin - enn einu sinni.
Ég var að klára verkefni í námskeiðinu Frá eddukvæðum til óðflugu og er að fara að huga að næsta verkefni í námskeiðinu Hagnýt málvísindi I. Það verkefni fjallar um kynjamál. Ég er að spá í það hvort einhver munur sé á "blogg-máli" og "sms-máli" eftir kynjum!!! Það væri svolítið gaman að rýna í það ef einhver möguleiki er. Ég læt ykkur vita ef ég verð einhvers vísari :)

Vefleiðangurinn kominn

2003-09-30T23:56:00.000Z

Jæja, þá er ég búin að föndra aðeins við vefleiðangurinn og á kannski eftir að bæta hann enn meira á næstu dögum. Ég lærði heilmikið á þessu, t.d. að setja inn "bookmarks" og setja inn "efst á síðu" o.s.frv. Hér er afraksturinn!!

Vefleiðangur

2003-09-30T20:59:00.000Z

Það er eins og skil á verkefnum hrúgist á sömu dagana þetta misserið. Í gær var það verkefni í eineltinu, í dag í Fornum sögnum.... og vefleiðangur og tæknisaga í UST. En á Íslandi í dag er allt hægt að gera á methraða - við hljótum að eiga heimsmet í vinnuálagi eins og öllu öðru m.v. höfðatölu eða hvað??

Ég var reyndar búin að gleyma blessuðum vefleiðangrinum þangað til í gær að ég rankaði við mér. Þannig að nú er ég einungis komin með drög að honum, en ætla mér að klára hann á næstu dögum eins og Íslands-hraðlestinni sæmir!!

Í vefleiðangrinum ætla ég að taka Vestfirði fyrir. Nemendum er boðið í starfsnám á auglýsingastofu og eiga þeir að gera ferðabækling um Vestfirði. Það sem taka á fyrir er: landslag/náttúra, atvinnulíf, tómstundir, þjóðsögur og sannar sögur, kirkjur, eyðibýli, gönguleiðir, athyglisverðir staðir, Hornstrandir, stærstu bæir.
Nemendum er skipt í hópa og tekur hver hópur fyrir eitt verkefni. Gefnar verða upp netslóðir þar sem upplýsingar um verkefnin koma fram, en auk þess er nemendum frjálst að afla sér upplýsinga úr bókum og öðrum upplýsingamiðlum. Því næst setja nemendur upp texta og myndir og skila útprentuðu. Verkefnunum verður svo raðað saman, þannig að þau myndi skemmtilega heild. Ritið verður því næst fjölritað og fær hver og einn nemandi eitt eintak til eignar.

Markmiðið með þessu verkefni er það að nemendur kynnist Vestfjörðum og öllu því sem þeir hafa upp á að bjóða. Þar að auki læra þeir heilmikið í tölvuvinnslu s.s. myndvinnslu og textagerð.

Tæknisaga - framhaldssaga

2003-09-27T01:17:00.000Z

Ég gleymdi einu mikilvægu hlutverki sem tölvan mín gegnir hér á heimilinu. Þegar við sem búum lengst frá höfuðborginni viljum bregða undir okkur betri fætinum er heldur en ekki gott að skella sér upp í næstu flugvél og ferðast í 40 mínútur í staðinn fyrir 5-6 tíma (á löglegum hraða að mestu) á hinum vinsælu þjóðvegum landsins. Til að panta flugfar nýti ég mér netið undantekninga lítið. Þetta er mjög einföld aðgerð sem framkvæma þarf inni á Flugleiða vefnum. Þar að auki er flugið ódýrara með þessum pöntunarmáta.

Tæknisaga

2003-09-20T16:03:00.000Z

Þá er tæknisagan næst á dagskrá.
Mér reiknast til að ég sé búin að eiga tölvu í 10 ár og ég man varla lengur hvernig lífið var án hennar. Í fyritu notaði ég hana einungis fyrir ritvinnslu og ættfræði í forriti sem heitir Espólín. Fljótlega fékk ég mér aðgang að internetinu, fyrst í gegnum heimilissímann, því næst ISDN línu og að lokum fékk ég mér ADSL tenginu sem er alveg nauðsynleg í fjarnámi.

Í dag væri líf mitt allt öðru vísi ef tölvunnar nyti ekki við. Hún gerði mér kleift að ljúka stúdentsprófi í fjarnámi við VMA og skrá mig til náms í KHÍ sem var ekki einu sinni í mínum bjartsýnustu draumum.

Á mínu heimili eru 2 PC tölvur (fyrir eiginmann og son) og auk þess eigum við fartölvu sem ég nota. Við eigum 1 GSM-síma, 3 stk. heimilissíma og 5 sjónvarpstæki!! Börnin 2 eru bæði með lítil sjónvarpstæki inni í sínum herbergjum, við hjónin með 1 í okkar herbergi, 1 stórt í stofunni og 1 lítið í eldhúsinu. Ég vildi svo sannarlega ekki missa neitt þeirra :)

Í dag nota ég tölvuna daglega, bæði í námi og starfi. Eftir að vinnudegi lýkur sest ég niður við hana, opna póstinn minn, fer inn á WebCT og fylgist þannig með þeim námskeiðum sem ég er í. Eftir að vera búin að lesa póstinn fer ég að huga að fyrirliggjandi verkefnum sem ég vinn öll beint á tölvuna.

Ég er leiðbeinandi/umsjónarkennari í grunnskóla og nota tölvuna einnig mikið þar - oft á dag. Ég skrái ástundun nemenda í Stundvísi-forritið og set fréttir, vikuáætlun og tilkynningar á heimasíðu bekkjarins. Þar að auki þarf að útbúa ýmisskonar verkefni og námsefni eða sækja á Skólavefinn.

Maðurinn minn notar tölvur líka daglega. Hann vinnur við setningu í prentsmiðju og fer sú vinna öll fram í tölvum. Þegar heim er komið sest hann líka við tölvuna og vinnur við tónlistarforrit sem hann nýtir sér, en hann er í hljómsveit/dúett og skrifar mest allt undirspil á tölvuna. Auk þess sækir hann texta og "midi-files" á netið.
Mikil tölvufjölskylda hér á ferð!!

Power-point verkefni

2003-09-16T16:20:00.000Z

Ég er búin að setja Power-point verkefnið mitt inn á heimasíðuna mína. Þar fjalla ég um streitu unglinga og hvaða afleiðingar hún getur haft. Efnið ætla ég unglingunum sjálfum svo að þeir átti sig á í hvaða hættu þeir eru varðandi streitu. Sjá tengil hér hægra megin á síðunni á heimasíðuna mína.

Nóg að gera

2003-09-10T17:07:00.000Z

Það er varla að maður hafi tíma til að skrifa inn á bloggið, þvílíkar eru annirnar í náminu. Þar á ofan eru kynningarfundir í grunnskólanum fyrir foreldra nemenda. Það er vonandi að um hægist í næstu viku.

Vefrallý

2003-09-07T23:41:00.000Z

Nú er ég búin að setja Vefrallýið inn á heimasíðuna mína. Hægt er að nálgast það í tenglum hér hægra megin á síðunni.

Komin heim

2003-09-06T21:18:00.000Z

Þá er ég komin heim eftir viku dvöl á Reykjum í Hrútafirði. Ferðin tókst með ágætum og voru nemendur sjálfum sér, fjölskyldum sínum og skólanum til mikils sóma. Þessi dvöl á Reykjum var mjög þroskandi og lærdómsrík fyrir krakkana. Þau fengu að fara í heimsókn á sveitabæ, skoða byggðasafnið, fjöruferð, íþróttir o.fl. o.fl. Síðast en ekki síst þá voru þau saman sem einn hópur og held ég að það þjappi þeim saman fyrir veturinn. Þar að auki kynntust þau jafnöldrum sínum frá Bolungarvík og Hólmavík.

Skólabúðir að Reykjum í Hrútafirði

2003-08-30T23:04:00.000Z

Næstu viku verð ég fjarri blogginu, þar sem ég er að fara í skólabúðir að Reykjum í Hrútafirði með 7.bekk Grunnskólans á Ísafirði. Farið verður eldsnemma á mánudagsmorgni og komið til baka seinnipart á föstudegi, 5.sept. Það er ekki laust við að spenna ríki fyrir þessa ferð, bæði hjá nemendum og kennurum. Ég hlakka til að kynnast krökkunum utan skóla og finnst mér alveg kjörið að fara í svona ferð í upphafi skólaárs, til að hrista hópinn saman.
Ég hef vonandi frá mörgu skemmtilegu að segja þegar ég kem til baka.

Hérna er ein mynd af krökkunum frá árshátíðinni s.l. vor, þegar þeir tóku Eurovision syrpu með stæl!

Tölvuleikir á netinu

2003-08-28T23:18:00.000Z

Ég verð nú að viðurkenna það að ég hef lítið skoðað tölvuleiki á netinu. Börnin eru þó hrifin af þeim leikjum sem eru í boði á Skólavefnum, en mörgum finnst þeir full barnalegir og einfaldir. En það er svo sannarlega hægt að verða sér úti um hina ýmsu leiki, þó svo að ekki séu þeir ókeypis allir.

Hér eru dæmi um nokkrar síður með leikjum:
Infrogames Kids
RealOne Arcade Games
TheFreeSite
GameHippo
Ég er svo gamaldags að ég legg kapal og finnst þvílíkur munur að gera það í tölvunni, þá þarf ég ekki að leggja undir mig eldhúsborðið. Hér er t.d. hægt að ná sér í mikið úrval spilakapla.

Skólasetning G.Í.

2003-08-28T22:39:00.000Z

Á morgun, föstudaginn 29.ágúst verður skólasetning Grunnskólans á Ísafirði. Ég mæti að sjálfsögðu þar og tek á móti bekknum mínum; 7.HS. Það er ekki laust við að sé smá spenningur í manni að hitta krakkana aftur eftir langt og gott sumar.
Við höldum úti heimasíðu á Skólatorginu sem hægt er að skoða hér.

Dreifmennt í Vestur-Barðastrandarsýslu

2003-08-25T22:03:00.000Z

Á vegum grunnskólanna á Tálknafirði, Bíldudal og Patreksfirði og Birkimelsskóla við Krossholt á Barðaströnd er unnið að því að tengja skólana saman með öflugu netsambandi. Markmiðið er að hægt verði að kenna sameiginlega í öllum skólunum með fjarkennslu í rauntíma. Verkefnið hefur hlotið nafnið Dreifmennt í Vestur-Barðastrandarsýslu. Jóhann Ásmundsson, safnstjóri á Hnjóti í Örlygshöfn, er einn helsti frumkvöðull verkefnisins og segir hann að með því opnist möguleikar á að einn kennari geti kennt árgangi sem dreifður er á alla skólana.

Það verður gaman að fylgjast með þessu starfi þeirra og sjá hverju upplýsingatækni nútímans fær áorkað.

Lærdómsríkir starfsdagar í grunnskólum

2003-08-25T21:54:00.000Z

Þessa dagana eru starfsdagar kennara í Grunnskólanum á Ísafirði. Ekki svo að skilja að kennarar starfi ekki aðra daga ársins, heldur má kannski frekar nefna þessa daga "starfsdaga án nemenda" og eru ætlaðir kennurum til undirbúnings fyrir vetrarstarfið. Skólinn verður settur föstudaginn 29.ágúst og hafa kennarar haft 2 vikur til undirbúningsstarfa, sem mér finnst alveg til fyrirmyndar. Flestir verða þá búnir að gera kennsluáætlanir vetrarins, spá og spekúlera í námsefni vetrarins, nýjum möguleikum til nálgunar á námsefninu o.þ.h. Síðast en ekki síst hefur skólinn boðið upp á ýmiss konar námskeið og fyrirlestra af ýmsu tagi.

Mig langar að nefna fyrirlestur hjá Svanhildi Kr. Sverrisdóttur um íslensku á unglingastigi, sem var afar fróðlegur og skemmtilegur. Svanhildur sér um heimasíðu hjá Námsgagnastofnun, sem heitir Málbjörg og er þar hægt að finna eitt og annað markvert um okkar ástkæra ylhýra. Ég hvet ykkur til að skoða þessa síðu ef hún hefur farið fram hjá ykkur hingað til.

Vefsíðugerð

2003-08-24T21:05:00.000Z

Nú er ég gjörsamlega búin að ganga fram af sjálfri mér. Í blíðviðrinu í dag (ca.20°C) þegar ég hefði átt að æða til fjalla með fjölskylduna í berjamó, lá ég yfir heimasíðunni minni og reyndi að breyta og laga það sem með þurfti. Svei mér þá ef eitthvað hefur ekki áunnist :)
Mig langar að benda ykkur á sætar bangsamyndir sem vekja upp hlýjar tilfinningar hjá manni.
Þið megið gjarnan skoða síðuna mína og segja mér ykkar álit á því hvað mætti betur fara o.þ.h.

Alvaran tekin við

2003-08-24T00:22:00.000Z

Nú er ég komin heim á Ísafjörð eftir skemmtilega staðbundna lotu í Reykjavík. Mér sýnist á öllu að ekki veiti af að bretta upp ermar, liðka fingrasetinguna og hefjast handa við hin ýmsu verkefni misserisins. Það er fullt af skemmtilegum og krefjandi verkefnum framundan þannig að ég hlakka til.

Menningarnótt 2003

2003-08-18T13:31:00.000Z

Menningarnótt var í Reykjavík 16.ágúst s.l. Talið er að allt að 80.000 manns hafi verið í miðbæ Reykjavíkur að kvöldi þess dags. Margt var hægt að gera sér til skemmtunar, s.s. hlusta á hljómsveitir, hlusta á skáld lesa úr verkum sínum, eða fara í leiktæki niður á höfn. Hátíðin náði hámarki sínu kl.23.00 um kvöldið með flugeldasýningu.

Venjan hefur verið að bjóða einu sveitarfélagi af landinu sem sérstökum gestum, og urðu Siglfirðingar fyrir valinu í ár, en í fyrra voru það Skagfirðingar. Af þessu tilefni sáu Siglfirðingar um sérstök skemmtiatriði.

Nánari fréttir af menningarnótt má sjá á Vísi og hjá Reykjavíkurborg, en þar er einnig hægt að sjá myndir frá menningarnóttinni.

Mynd af mér

2003-08-15T16:41:00.000Z

Hér er mynd af mér

Upplýsingar um vefinn

2003-08-15T16:22:00.000Z

Netið hefur opnað dyr að hinum ýmsu upplýsingum og þjónustu. Hægt er að koma sér upp vinahópi, komast á stefnumót, eða tjá sig um málefni líðandi stundar, svo eitthvað sé nefnt.

Tengt í sessunauta

2003-08-15T16:07:00.000Z

Ég sit hjá Eyrúnu Helgu

Kynning

2003-08-15T15:52:00.000Z

Ég heiti Helga Sigfríður og er fjarnemi á 5.misseri KHÍ - grunnskólaskor. Ég starfa sem leiðbeinandi við Grunnskólann á Ísafirði og verð með umsjón í 7.bekk í vetur. Ég er í sambúð og á tvö börn; Snorra 10 ára og Kristínu Hörpu 7 ára.
Heimasíðan mín er hér.

Byrja

2003-08-15T08:14:00.000Z

hér byrja skrifin.